بصوا الموضوع باختصار اني كنت فى سوبر ماركت كبير  وصلنا لقسم كان فيه زجاجات بلاستيك الزجاجات دى المفروض انها بتتباع عشان تتعبى ماية وتشرب منها لان مش اى زجاجة بلاستيك نقدر نعبيها ونشرب منها فى انواع بتصنع من مواد سامة او بتتفاعل مع الماية وبتسبب امراض منها السرطان نفس الكلام مع الاطباق البلاستيك او الفوم مش اى نوع نقدر نحط فيها اكل لان بردوا بيحصل تفاعل مع الاكل والسخونة وبتسبب امراض …
 
اى زجاجة بلاستيك او طبق بلاستيك لازم يكون فيهم ختم صغير عبارة عن مثلث جوة المثلث رقم صغير والارقام دى بتختلف بداية من 1 لحد 7 كل رقم له معنى بيدل على نوع البلاستيك المستخدم فى التصنيع وعلى اساسه بنعرف اذا كان النوع صالح للاستخدام نشرب او ناكل فيه او انه سام نبعد عنه
 
انا مكنتش هشترى لكن الفضول خلانى امسك اكتر من زجاجة كانوا تصنيع ” فيتنامي ” مختومين برقم “7 ” الرقم ده معناه ان الزجاجة تم تصنيعها من مواد مختلفه غير معروفه والنوع ده مينفعش يتعمل منه زجاجة شرب او طبق للاكل ولو اتعمل منه مينفعش حد يستخدمه لان المواد لان زى ما قولنا مصنع من مواد كتير ولازم نتجنب استخدامه وفى رضاعات اطفال بتتصنع منها بس دى بتكون امنه فى حالة ان كان مكتوب عليها BPA-free bottles وبتكون فى الحالة دى خالية من البيسفينول
 
استغرب جدا مسكت زجاجة تانية شكلها مختلفه لقيتها بردوا ” فيتنامي ” وواخده نفس الرقم ” 7 ” مكنش فى حد فى القسم عشان اساله ازاى زجاجات زى دى محطوطة هنا وبتتباع للشرب !!!
وبرغم من كده كان فى زجاجات تانية جمبها واخده رقم ” 5 ” ودى امانه للاستخدام وسعرها اغلى من اللى كانت واخده رقم 7
 
العلامات دى مش من اختراعى ودى علامات عالمية معترف بيها فى العالم كله فى تصنيع مستوى خطورة انواع البلاستيك المستخدم فى الطعام والشرب
 
والناس اللى متعرفش معنى الارقام دى
 
رقم 1 يعنى تستخدمها مرة واحد فقط
رقم 2 لو معمول منها زجاجة او طب تقدر تستخدمهم عادى واكتر من مره
رقم 3 تبعد عنها لانها مصنعه من مواد سامة
رقم 4 نسبة الامان فيها مش عالية
رقم 5 دى الافضل تقدر تسخدمها اكتر من مره بكل امان
رقم 6 تبعد عنها لانها مصنعه من مواد سامة
رقم 7 تجنب استخدامها لانها تصنع من مواد مختلطه وممكن استخدامها لو كان مكتوب عليها BPA-free bottles
 
ملحوظة اللى مش متاكد من الكلام ده كلة يدخل جوجل وقدر يتأكد
ودى صور للزجاجات داخل احدى المحلات
زجاجات مياه سامة

كتابة نرمين حسن