فيروس زيكا .. !
***
ده فيروس اتصنف من منظمة الصحة العالمية قريب على إنه وباء مفاجيء ومرض سريع الانتشار .
إيه قصته ؟
في سنة 1947م في ( غابات زيكا ) في مدينة اسمها ( انتيبي ) في دولة ( أوغندا ) جنب بحيرة ( فيكتوريا ) اللي هي أول منبع لنهر النيل في أفريقيا .. مجموعة من العلماء كانوا حاطين قرد نسناس في قفص قدام مختبر الفيروسات بتاعهم .. فبعد كام يوم لقوا القرد سخن وعيان .. كشفوا عليه وحللوله .. لقوا عنده فيروس جديد لانج .. فقاموا مسمينه باسم ( زيكا ) على اسم الغابات اللي قاعدين فيها .. وزيكا يعني الضخم في اللغة الأوغندية .
*
وفي سنة 1952 اتعملت ابحاث في الهند قالت ان فيه كتير من الهنود عندهم مناعة ضد مرض ( زيكا ) مما يدل على ان المرض قديم بس اكتشافه هو اللي حديث .. وفي سنة 1954م أول ظهور للفيروس على بني آدم كان في نيجيريا .
*
بيعمل ايه المرض ده ؟
أعراضه .. حمى وسخونية .. التهاب جلدي .. التهاب في جفن العين .. صداع .. آلام في العضلات والمفاصل .. همدان في الجسم كله .. وبعدين بيدخل في حيز المضاعفات للمرض .. زي ( متلازمة غيلان باريه ) .. ودي يكفيكوا الشر .. التهاب حاد في الاعصاب .. بيؤدي لمضاعفات خطيرة .. زي ان 25 % من المرضى بيبقوا عايزين تنفس صناعي .. 50 % عندهم ضعف تنفس .. 60 % مابيقدروش يمشوا .
*
أهم عرض للمرض هو تشوه رؤوس المواليد وعدم اكتمال نمو مخهم .. واللي هو اسمه ( مرض الصعل ) .. لأنه ثبت علميا ان الفيروس ممكن ينتقل لمشيمة الأم الحامل .. سواء منها نفسها .. أو من جوزها اللي عنده الفيروس .. وأشهر حالة للموضوع ده .. عالم الأحياء الأمريكي ( بريان فوي ) لما مرض بالفيروس أما كان في ( السنغال ) في 2009 .. وانتقل الفيروس لزوجته عن طريق الاتصال الجنسي أما جالها زوجها ( أمريكا ) .
*
إيه اللي بيسبب المرض ده ؟
الناموس .. هو أكبر ناقل لفيروس زيكا .. وأشهر ناموسة صنفوها العلماء بأنها الأخطر على الاطلاق لانتشار المرض .. هي ( الناموسة المصرية ) .. واللي اسمها العلمي ( الزاعجة المصرية ) .. ودي نفسها بتنقل ( الحمى الصفراء ) و ( حمى الضنك ) ” مرض تكسير العظام ” .
الناموسة دي اتأقلمت واتكيفت على أجواء ومناخ كل القارات .. الا انها بتنشط في فصل الصيف والربيع أكتر من الشتا .
*
حاليا فيروس زيكا موجود في غالب دول العالم .. والناموسة المصرية سافرت مع حركات السفر والتجارة بين الدول .. الا ان الفترة الاخيرة زادت أعداد الناس المصابة بالمرض في دول معينة .. زي ما أعلنت منظمة الصحة العالمية .. وهم :
– أكثر من مليون شخص في كل دول العالم .
– 38 الف حالة في البرازيل ( بينهم 49 حالة وفاة ) .
– 13 الف حالة في كولومبيا ( بينهم 100 طفل رضيع براس صغيرة ) .
– 5500 حالة في السلفادور .
– 608 حالة في هنداروس .
*
الإتحاد الأوربي أعلن حالة الطواريء ضد المرض عشان انتشاره في اكتر من دولة اوربية .
*
رغم الهيصة دي كلها .. فالمرض مش مصنف على انه شديد الخطورة .. لأن كل أعراضه ومضاعفاته لها علاج .. ماعدا القضاء على الفيروس نفسه لسه ماعملوش له لا مصل ولا تطعيم .. ويقال انه مش هيبقى متوفر الا بعد سنتين عالاقل .. اما الخوف كله من تشوه المواليد .
*
لحد دلوقتي محدش اعلن ان فيروس ( زيكا ) جه مصر او الدول العربية .. وبرغم ان الناموسة اسمها ( الزاعجة المصرية ) .. بس مش هي نفسها الناموسة السودا اللي بتمص دمنا في الصيف .. بتاعة ( زيكا ) مخططة وبتلسع لسعه أكبر .
*
أخيرا :
الاطباء والعلماء بينصحوا بملابس تغطي الجسم من الناموس .. واستخدام المبيدات الحشرية سواء في البيوت او ان الحكومة ترش الشوراع واماكن تجمع الناموس .. زي مقالب الزبالة والمصارف وغيرها .. وعدم تخزين مية مكشوفة عشان ماتكونش عرضه للناموس ده .. واخيرا الناس اللي مسافره للبلاد اللي فيها المرض منتشر زي دول أمريكا الجنوبية ياخدوا كامل احتياطات الأمن والسلامة ضد المرض .. واللي هايلاقوها اول ما ينزلوا اي مطار عندهم .. وربنا يعافينا ويعافيكم .
*
مراجع :
https://goo.gl/t3Cbqr
https://goo.gl/25VzON
http://goo.gl/QqZZMi
http://goo.gl/GRB1Wq
‫#‏زيكا‬
‪#‎zika‬

المقال كتابة : MO7SN